د افغانستان د اسلامي امارت د رییس الوزار لومړی مرستیال ملا غبدالغني برارد وايي، چې د مخکني حکومت مفسدو چارواکو ته په هېڅ صورت په حکومت کې ځای نه ورکوي.
ښاغلي برارد چې په لومړي ځل د ملي رادیو تلوېزیون سره مرکه کوله، ټینګار وکړ، چې حکومت به پر پخوانیو مفسدونو بدنام نه کړي.
ښاغلي براد په دغه مرکه زیاته کړه، چې د قدرت د انحصار خبره رد کړه ویې ویل، چې حکومت ټول شموله دی او د ټول شمولوالي لپاره یې لا هم هڅې روانې دي.
هغه و ویل« طالبان یوه ډله نه بلکې یو نظام دی، ټول اقلیت او اکثریت قومونه خپل ځان په کې لیدلای شي، خو دا یوه خبره کوم، چې موږ خپل نظام په پخوانیو څو مفسدو څېرو نه بدناموو، دا ځکه که موږ هغوی ته ځای هم ورکړو، نو د هغوی فساد او خیانت عادت ګرځېدلی او نه ځینې اوړي.»
ملا عبدالغني برادر د هېواد د اقتصادي ستونزو په اړه و ویل، چې ولس باید له صبر او حوصلې څخه کار واخلي، ځکه اسلامي امارت د اقتصادي وضعیت د ښه کولو لپاره جدي هڅې پیل کړې دي.
د هغه په وینا د دوی د هرې ورځې د ناستې لومړی خبره د هېواد د اقتصاد په اړه وي، چې څنګه کولی شي، اقتصاد ښه شي، خلکو ته د کار او تعلیم زمینه برابره شي.
دی وايي، چې د همدې لپاره اسلامي امارت هڅه کوي، چې د هېواد د معدنونو استخراج ته زمینه برابره کړي چې په وینا یې په همدې تړاو له ځینو سوداګرو، شرکتونو او ان ځینو هېوادونو سره خبرې اترې روانې دي.
ښاغلي برارد د نړیوالو په ځانګړي ډول د امریکا هغه تورونه او اوازې هم رد کړې، چې ګڼې اسلامي امارت بشري حقونو ته درناوی نه کوي او یا هم افغانستان له بحران سره مخ دی.
نوموړي ټینګار وکړ، چې اسلامي امارت بشري حقونو په ځانګړي ډول د ښځو حقونو ته کلک ژمن دی او تر اوسه پورې څوک نه شي ښودلی، چې د اسلامي امارت له واک ته رسېدو تر اوسه پورې د هېواد په کوم ګوټ کې له یوې مېرمنې سره زور زیاتی شوی دی.
د هغه په وینا د ښځو د تعلیم او کار لپاره هم د اسلامي امارت هڅې روانې دي، خو په وینا یې دا هر څه به د اقتصاد له ښه کېدو او تخنیکي ستونزو وروسته برابرېږي.
ښاغلي برارد د بشري حقونو په اړه د پوښتنې په ډول و ویل، چې د بشري حقونو درناوی امریکا او نړیوال نه کوي، که اسلامي امارت.
نوموړي د افغانستان کنګل شوې پیسې وښودې، چې په کوم اساس امریکا او نړیوالو کنګل کړې او دا څنګه بشري حقونه دي، چې امریکا د افغان ولس پیسې کنګل کړې دي.
هغه دا خبرداری هم ورکړ، چې نړۍ خو افغانستان کې د بشري بحران او فقر نارې وهي، خو په وینا یې که چېرته د افغانستان پیسې خوشې نه کړي نه یوازې افغانستان، بلکې ګاونډیو، سیمې او نړۍ هېوادونو ته به هم ستونزې جوړې شي.
دی وايي، که نړیوال او امریکا په رښتیا غواړي افغانستان کې بشري ناورین رامنځ ته نه شي، نو د افغانستان حکومت دې په رسمیت وپېژني، تر څو راکړې ورکړې ته زمینه برابره شي او د افغانستان اقتصاد په خپلو پښو ودرېږي.
نوموړي په ورته وخت کې د نړیوالو له خوا د بشري مرستو مننه وکړه، خو په وینا یې اصلي مرسته به دا وي، چې حکومت په رسمیت وپېژني تر څو افغانان په خپله خپل اقتصاد په پښو ودروي.
ښاغلي برادر د جمهوري نظام له پوځي او امنیتي منسوبینو سره د تاوتریخوالي ادعاوې هم رد کړې او دا یې د غرب او مډیا تبلیغات وبلل.
نوموړي زیاته کړه، چې د پخواني نظام له افسرانو سره په ښکاره زورزیاتی نه دی شوی، خو که چا په پټه کړی وي هم نیول شوي او په سزا به ورسېږي.
ده و ویل«دا تبلیغات دي، موږ د خپل امیرالمؤمنین د حکم په اساس حتا د چا د وهلو اجازه هم نه لرو.»
په همدې ترڅ کې ښاغلي برادر د پرځول شوي ولسمشر محمد اشرف غني هغه خبره هم رد کړه، چې ویلي یې وو، که کابل کې پاتې وای وژل کېده.
ښاغلي برارد و ویل«که هغه باچا و که ګدا وو که هر څوک په دغې اداره کې زموږ له طرفه ورته عفوه وه. نو موږ به څنګه یا اشرف غني وژلی یا به مو بل وژلی؟ موږ عفوې ته ژمن یو. موږ د خپل مشرتابه چې کوم هدایت موږ ته شوی وو هغه ته ټول مجاهدین ژمن وو.»
ملا برادر د طالبانو پر ضد د مقاومت هڅو ته په اشارې سره زیاته کړه، چې ټول افغانستان د اسلامي امارت تر کڼټرول لاندې دی او هېچا ته به اجازه ورنه کړي، چې امنیت اخلال کړي.
ښاغلي برادروويل« هغه وخت چې د امریکا په شمول ۴۵ هېوادونه یې ملګري وو، ځمکه او اسمان یې په واک کې وو، په افغانستان کې یې ځان ټینګ نه کړ. موږ باوري یو چې په ټول افغانستان کې به د یوه کلي د نیولو توان هم ونه لري.»
د افغانستان د اسلامي امارت د رییس الوزرا لومړی مرستیال د خپلو خبرو په پای کې یو ځل بیا ملت ته ډاډ ورکړ، چې دوی د اقتصادي ستونزو د حل لپاره جدي هڅې پیل کړې او ملت ته پکار ده، چې لږ صبر وکړي.
LINK: https://www.ansarpress.com/english/25615
Ghani Removed From UN Heads of State List 
